家家戶戶歡天喜地迎接新年，噚日朝早卻傳來壞消息，幾個扎鐵工人同的士司機真正飛來橫禍，不幸交通意外身亡，八方聽到呢個消息都覺得好唔安樂，希望佢哋家人節哀順變。噚日開始放假嘅煲呔，反應好快，意外後冇耐就去到現場慰問家屬，為官者咁做好應該，但上演一幕哭跪特首，卻係意料之外。
電視鏡頭所見，情緒激動嘅家屬質問煲呔有冇做好佢份工，煲呔又同家屬同聲一哭，但佢離開車禍現場，轉個頭就去維園行年宵，高高興興辦年貨，市民看在眼裏難以理解，點解唔取消行花市呢個安排呢？有官員亦私下表示，不理解特首辦呢個安排，恐怕煲呔剛剛回穩嘅民望，因此一舉勾銷。
知情人士則解釋，煲呔去車禍現場前，知道有家屬在場，亦預計佢哋心情未平復，因此想親自到場安慰佢哋；而行年宵係傳統安排，好多檔主都希望特首到場打氣拜年，為咗唔想令檔主失望，引起不滿，所以煲呔點都要到。

行維園年宵40幾年

知情人士又指，其實好多公職人員都面對類似情況，連續現身紅、白二事並唔罕見，職責所在，實在難以避免，而煲呔事後亦指令民政局、張建宗、鄭汝樺等局長全力協助家屬，跟進執法問題。煲呔自己則話，行咗維園年宵40幾年，年年都要去行個圈、望一望先似過新年，所以噚日堅持傳統行花市，與民同樂。
一如以往，煲呔兩夫婦喺花市花咗幾百蚊買銀柳、串串金同富貴子等年花，又買咗頂由跳舞組合EO2設計嘅帽，盛惠120蚊，雖然唔係幾襯佢，但由於部份收入會捐助病童，所以佢都要破費。近年維園年宵貨物種類立立雜雜，玩具、電器乜都有，似大笪地多過花市，煲呔行咗一圈，都話氣氛同以前唔同咗，佢又幫襯中學生用168蚊買咗兩個奶樽毛公仔，又買咗由長者製作嘅走馬燈，收穫都算十分豐富。煲呔行完花市就上機去美國度假避年，送走諸多麻煩嘅老鼠，牛年再戰江湖。

mailto:[email protected]