早排傳出馬壇神童蔡明紹因為成日搏輸馬而失寵於東廐，佢自己知自己事，近期起勢幫師傅告東尼贏馬自救，包括呢日第六場為「超綵」爆冷打開今季勝門。數數手指，東廐近三W「牽動美麗」、「四季星」及「超綵」都係出自蔡明紹手筆，後者自從上個月30號贏完東廐「美麗昇華」後，五月份跑咗五次賽事，其中三次都有馬贏，做番東廐主攻手。蔡明紹同時係今日第三位有馬贏之華將，有份為本地薑取得近期代表作出力。
至於告東尼連續第二年於亞視盃賽馬日建功，截至呢日第六場，今季東廐已經贏到第44W，落後第一位蔡約翰只係四W，正式成為今季爭標分子。「綵」系今日原本雙龍出海，不過第七場王經緯名下之「勁綵」賽前因食慾不振退出，得番王經緯爸爸王明澤之「超綵」單騎應戰，好彩人馬都表現爭氣。