89年採訪民運的資深傳媒人謝志峰，去年在朋友邀請下欣賞《喂！》劇，直言看完演出後「淚流滿面」；劇中的六四亡魂在泉下討論是否該去投胎做人，暗喻在生的人面對「堅持」和「放下」的抉擇，箇中痛苦同樣難以言明。他自言不會放下、不會忘記，會繼續前行，用自己的方式推動國家進步，包括繼續談六四。
謝志峰相信，曾經經歷六四的人，都無法忘懷當年創傷，「但係中國共產黨仍然係執政黨，我哋一方面好㷫佢，但又想合作、國家進步，係情感同理智交戰。」他指製作此劇的年輕人坦誠地點出這種掙扎，「可見佢哋對中國好有感情，而且感情好深，先可以寫得出嚟。」他亦喜歡該劇的佈景，令他恍如重臨故地，熱淚直流。

要對得住良心

他指不少人選擇繼續堅持，要求政權就事件作出公正評價；有人選擇大步向前，發展生產力，兩種選擇同樣困難，冇所謂對和錯，「我覺得最緊要係秉承住一樣嘢，要對得自己良心住，最慘係有啲人只係為咗利益、為咗依附權貴，講到要祖國前進發展係忍辱負重，掛羊頭賣狗肉，扮晒嘢。」
他自言絕對不能放低，至今提起六四仍會流淚，午夜夢迴，當晚的場面又會一幕幕重現，「我認為『向前』和『堅持』兩樣嘢可以並存，我希望中國進步，呢樣嘢唔阻礙我懷念六四，我咪用我嘅方法，幫助中國進步囉，繼續提住呢件事，等內地民眾明白有人企喺佢哋嗰邊。」同時監察內地貪污、豆腐渣工程。