傅天穎為寫真減十磅
奀妹傅天穎噚日喺銅鑼灣出席公開活動，佢話𠵱家正積極減肥，要減到回復初出道時嘅身形，佢話：「我前幾日睇報紙話我肥，搞到我飯都食唔落，其實係我骨大啫，不過我會減番十磅，等出年出本寫真集時靚啲。」問佢本寫真集有冇大膽造型，佢就話：「唔得，我屋企好嚴。」
黃伊汶去旅行減壓
黃伊汶噚日去咗新城接受訪問，佢話屋企家教好嚴，由細到大除咗出埠旅行外，未試過玩到唔返屋企瞓，就算𠵱家出嚟做嘢，每隔兩、三個鐘就同阿媽通一次電話。佢重話家姐早兩日冇返屋企瞓，卒之俾阿媽哦咗好耐喎。黃伊汶又話：「有時喺香港做嘢好大壓力，諗住賺到錢就去旅行，連相士都話我驛馬星動，成日有機會出外，就算去啲近近哋嘅地方好似日本、台灣同泰國咁，我都已經好開心。」
《雪地裏的星星》首映浪漫
由何潤東、陳怡蓉同邱澤主演嘅台灣偶像劇《雪地裏的星星》日前喺台北西門町舉行首映，幾位主角換晒隆重禮服出席，大會重安排六部人造雪花機，一邊噴雪一邊播西村由紀江嘅鋼琴音樂，襯托主角進場，同觀眾一齊睇大電視，搞到鬧市突然間變得好有浪漫氣氛。
許志安水晶鏈擋煞
許志安噚日去新城電台出席「平等機會大聯盟二○○二」記者會，佢重係平等機會大使。只見安仔手上戴了水晶鏈，左手是兩條一深一淺嘅綠色水晶，安仔話：「呢兩條水晶鏈分別保佑事業同財運，右手戴嘅黑水晶就擋是非，希望幫自己之餘，亦可幫埋朋友擋是非。」
譚耀文上海拍劇倒貼
譚耀文𠵱家喺上海拍緊劇集《半生緣》，佢話拍呢套劇都幾辛苦，所以唔會虐待自己，喺上海每月用三千蚊請咗一個助理，又每月用七千蚊包咗部連司機嘅車，等開工、收工有人接送，自己就可以有多啲休息時間，雖然每個月支出成萬蚊，但佢話都值得喎。
崇基崇德唔敢貼街招
張崇基同張崇德嘅演唱會本月二十八日喺紅館舉行，佢哋噚日喺一間教非洲鼓嘅學校綵排時話：「我哋為咗奉公守法，今次演唱會冇四圍貼街招，驚要罰六百蚊，雖然少咗宣傳，但係啲飛一星期前都去咗六成，我知道圈中好多朋友都買咗飛。」