當年今日
關於我們

康仔吳國敬Bobby騎呢F4玩嘢
馮仁昭四圍超:許志安著厚背心似仔仔

蘋果日報 2002/05/04 00:00


許志安、蘇永康、吳國敬同歐陽震華(Bobby),前晚去咗黃埔嘅新城娛樂台,接受節目《今夜陽光燦爛》嘅訪問。佢哋主要宣傳康仔今個月二十一日同二十二日喺紅館開嘅個人演唱會。
安仔佢哋四個前晚接受訪問,居然話自己係台灣組合F4,問邊個係仔仔周渝民,歐陽震華指住康仔話:「佢最矚目,梗係佢啦。」但康仔認為應該係安仔,佢話:「你睇吓佢着住件咁(厚)嘅衫。」

不敢笨豬跳
言下之意,康仔似乎暗示着住厚背心嘅安仔,就好似仔仔早排嚟香港去無綫電視城咁,因為怕凍着咗件羽絨外套。
安仔早排陪康仔去選購演唱會嘅衣服,佢話:「我想佢演唱會啲衫可以立體啲,咁四面台都可以見到,或者喺佢背部畫地圖,寓意佢會衝出香港。」任賢齊早前公開話會喺演唱會玩笨豬跳,但康仔就話:「如果我玩笨豬跳會慘不忍睹!」

張學友台灣搵真銀
張學友已經有七年冇喺台灣開過收錢嘅個唱,佢下個月二十二號就會喺台北舉行世界巡迴個唱其中一站,而場地就會係台北市立體育場,最貴門券賣一千八百台幣(約四百港元)。
學友咁多年冇喺台灣正式舉行個唱,所以主辦單位重打算加場㖭。
陳松伶鮑魚做早餐
陳松伶早前同家姐及名廚楊貫一去咗杭州遊山玩水,松松重順便喺內地搞fans聚會,佢話今次行程最開心嘅一刻,係回程時楊貫一特登準備咗價值五萬幾蚊嘅五頭鮑畀佢同家姐喺飛機上面當早餐食,搞到佢哋連飛機餐都食唔落,啲空姐都睇到眼甘甘。松松話用鮑魚做早餐就聽得多,親身感受都係第一次。

葉璇否認詐傷辭演
葉璇早前因為腰傷而辭演無綫新劇《打更急先鋒》,但近日有報道話佢咁做,其實係唔滿意喺劇中要扮wet妹,兼且第一集就俾人搞大個肚,怕影響形象所以辭演。對於以上傳聞,葉璇噚日透過電話否認,佢話:「梗係冇呢件事啦,我接劇嗰陣都試埋造型,做演員一定要試唔同角色,我又點會介意噃。況且我條腰真係有問題,𠵱家我同公司請假係有醫生紙。」

爾冬陞晉身電影諮委會
政府噚日公布行政長官已經委任四個新成員,加入電影服務諮詢委員會,為期兩年,當中包括爾冬陞同安樂電影發行公司老闆江志強,另外兩人就係潘從傑同汪長智,而行政長官亦再度委任五個現任成員,任期兩年,包括周梁淑怡、洪祖星、馬逢國、吳思遠同吳昊。

譚詠麟內地演出兼遊埠
譚詠麟(阿倫)早前應中國綠色版圖環保基金會邀請,到內地溫嶺出席一個關於環保嘅大型綜藝晚會,兼且擔任表演嘉賓,台灣樂隊迪克牛仔主音老爹亦有份演出,阿倫重乘機同老爹暢遊溫嶺嘅名勝古迹,包括長與峒天、八仙巖同凌霄硐。

羅慧娟保聽覺少用手機
羅慧娟噚日去咗灣仔,出席有關聽覺受損學童嘅講座。羅慧娟早前因為潛水令耳仔受損,右耳需戴上隱蔽式助聽器,佢話:「長期戴會有啲唔舒服,但都習慣。而且芳芳姐(蕭芳芳)都畀到好大鼓勵我,為咗對隻耳仔好啲,我𠵱家都減少用手提電話。」
顏穎思化身香香公主
由香港、台灣、內地同新加坡合資嘅四十集電視劇《書劍恩仇錄》,現時拍得如火如荼,呢個劇嘅男女主角已落實由趙文卓夥拍關詠荷,但係「香香公主」一角喺開拍前仍懸空,之前曾傳出有意搵韓星宋慧喬演出,不過近日有關方面已敲定由顏穎思演出「香香公主」,佢日前已飛去橫店試造型同開工。