聽晚首播嘅ViuTV選美真人騷《美選D.n.A》，節目未出街連續爆是非，又有人嗌退選，其中候選佳麗之一、16號嘅石希露噚日喺facebook爆粗鬧ViuTV，話覺得自己被玩。事源係電視台攞咗佢喺才藝表演中嘅演出嚟做宣傳片，片中石希露表現失準，仲被主持之一嘅郭偉亮（Erick Kwok）寸。

石希露今日接受《蘋果》電話訪問時，話自己唔係刻意爆粗，只係覺得fb係私人空間，佢嘅宣洩只係諗住同朋友講，可以「做番自己」，並冇預期有街外人睇到自己個status，佢用把慘慘嘅聲線回應：「老實講都唔係話嬲，真係為唔開心為主，因為拍緊嗰一吓都知自己大提琴係失咗準嘅，拉得唔好，都預咗到時可能節目出街時，都會有啲人會批評同取笑，因為係自己做得唔好、表現唔好冇得怪人。」

但係冇諗過節目出街之前會喺fb專頁會有一條關於個大提琴表演嘅片upload上去，石希露表示真係好唔開心：「拍攝嗰陣都因為個大提琴表演而好崩潰、好失控咁喊過，對於我嚟講都係一個傷口嚟嘅，我冇諗過會喺fb，除咗個節目出街以外嘅情況下會再有一條咁樣嘅片囉。」

石希露受訪時重申自己原定表演項目係訓練狗仔，可惜嗰隻狗仔因病入院，臨時失場，所以石希露臨急臨忙改拉大提琴，佢話自己斷斷續續學過兩年幾大提琴，但講緊嘅已經係初中年代嘅事。