杜汶澤幫奇妙電視主持嘅《杜汶澤食住上》烹飪節目喺後日首播，頭炮首集邀請咗鄧麗欣（Stephy）做嘉賓，仲請對方到佢屋企下廚煮燒雞。口不擇言嘅阿澤自嘲朋友唔多，若然請同佢交惡嘅人上節目，就多到要主持過百集先應付到。

冇俾葉念琛追

喺節目入面，阿澤就笑Stephy成日同葉念琛合作拍戲，咬定對方想追Stephy，Stephy就即刻澄清話：「佢邊敢媾我？講笑啫！呢啲係世人偏見，可能佢覺得我好好拍，真係冇追過我，我哋喺拍攝現場甚至好少傾偈。」阿澤乘機問Stephy同男朋友同居嘅話題，Stephy好認真話：「我未試過同男朋友同居，未結婚都未叫認定嗰個人，唔會同佢住。」阿澤即大感詫異：「你呢個諗法好怪！我以前拍親拖都一定會同居，有啲同咗居先拍拖，所以我結過兩次婚，你就仲未嫁。」Stephy隨即狂問阿澤以前一腳踏幾船嘅感受，阿澤笑住話：「忙囉！」
撰文：馮仁昭