日本漫畫《死亡筆記》除咗喺亞洲地區大受歡迎外,其實自從出咗英文版後亦喺歐美地區受漫畫迷追捧,最近加拿大將會播放電視電影《Devil'sDiary》,預告片曝光後已經俾網民插佢喪抄《死亡筆記》。
將喺本星期六於加拿大LMN電視台首播嘅《Devil'sDiary》,預告片已經喺YouTube有得睇,阿Deep發現有好多網友睇完都指摘套劇係抄襲日本漫畫《死亡筆記》。單睇預告,大家會見到個女主角喺墳場執到本筆記,之後佢就利用本筆記殺人,佢喺上面寫咗好多充滿痛恨同殺人字眼,跟住又有人因為咁而車死或者燒死,就算場面唔係一樣,阿Deep同網民都覺得概念似足《死亡筆記》,連電影權威網站IMDb入面都有好多網民鬧套嘢抄。