噚日係香港回歸十周年嘅日子,亦係側田31歲生日,前晚佢就叫齊班朋友去中環halo酒吧慶祝,同公司嘅吳雨霏(Kary)、傅穎、楊愛瑾(Miki),以及經理人黃柏高都到齊,崔建邦、房祖名都有到賀,連側田緋聞女友林苑都着晒低胸裝嚟賀壽,不過林苑坐的士到場時,一見有記者,即刻表現愕然,問佢係咪去側田生日會,佢就好驚咁話:「唔係唔係,我約咗朋友之嘛。」
林苑行到酒吧門口都唔敢入,卒之擾攘咗五分鐘之後,有個男人喺酒吧裏面出嚟接咗佢入去。玩到噚日凌晨三點左右,林苑同成班人一齊喺正門出嚟,然後借人群遮擋下快速閃走,同一時間,側田就喺後門走人。