朋友傳來某報的副刊專欄截圖，內容是該作者跟某位馬評人每場四隻提供，在谷草長買孖寶搵到食。

谷草夜馬多數跑八場，共有七口孖寶，以四射四買即每組最低消費160元，全晚成本1,120元。

該作者以2月尾連續四次谷戰為例，利用這方法買贏了1,200蚊有多。朋友問做同類孖寶基金有冇得諗？

以包圍式長轆孖寶，一向較難處理，彩池不夠大及沒有回扣是先天不足，兼且若以連環扣方法處理，除了那個組合為當日頭尾場外，每當全場組合無W或第二，就會「一屍兩命」！

舉例這個四射四共16注的孖寶買法，於夜馬二至七場若揀四隻全撻的話，一組實則輸掉 32注，以上文那位作者提到上月盈利1,200蚊左右，未夠捱四組睇錯。

不過，更重要是這四次馬盈利，包括一條過千蚊的孖寶，倘若沒有的話，整個月盈利就差天共地。

一季過千蚊派彩的孖寶，不是話有就有，尤其快活谷，該作者舉例一段期間派彩會好一點，因為莫雷拉跌watt兼有停賽。

提到買孖寶，周三（11日）晚沈集成只出「小米周」、「威信」及「力奇先鋒」三駒，分別跑第六、七及八場，一注全晚尾口沈廐孖寶自然不能錯過。

其中，「威信」自轉向谷草一哩發揮以來，表現猶如脫胎換骨，連續三次以無敵姿態掄元，所交出的表現指數亦夠贏二班同程，有力邁向四連捷。

至於「力奇先鋒」上仗出戰田草1200米全程被頂在外叠仍有亞軍，以頭馬「必得勝」及殿軍「勇闖者」再出均勝，今勻前駒轉戰谷草同程對手級數減弱，應可補中。