蔡卓妍(阿Sa)、任達華、陳煒等噚晚喺灣仔出席慈善活動，Sa媽媽盛裝打扮，Sa笑話﹕「今日我係陪媽咪嚟，其中一位auntie搞，媽咪幾個月前己經同我公司mark期。媽咪話唔習慣去大場面，專登搵我嘅化妝同髮型師幫佢整。」出一個活動都咁緊張，咁如果阿Sa結婚，Sa媽媽咪仲緊張，阿Sa即刻扯開話題﹕「唔係掛？但我表弟就快結婚，佢都好緊張。」

早前《變形金剛4》喺港開工被收陀地，阿Sa就話﹕「以前返內地拍戲都試過，但無咁明目張膽，最多喺鏡頭前行嚟行去，當時阿澤(杜汶澤)同佢理論兩句，最終嗰日冇拍。」任達華就話係多事之秋，他直覺製片處理好有問題，佢話﹕「幾十年前有呢啲事都坐埋一邊傾，近十年市民會幫助拍戲，呢件事影響電影界同香港聲譽。」

另陳煒早排畀人影到佢同男性友人去睇三級片，佢話冤枉﹕「真係好大誤會，其實係四個人，有兩個遲到，我同嗰個男士早入場，但其實唔熟。」佢話老公都識對方，問點解要睇三級片？佢話﹕「唔係我揀，係喜劇，都唔尷尬。」