由韓國男團JYJ成員金在中夥拍《結婚契約》嘅29歲女星UIE主演嘅新劇《Manhole》噚晚首播，今次劇集係金在中退伍首部作品，劇情講男主角金在中一直暗戀18年好友UIE，當佢預知UIE將於一周後結婚，於是重返過去改變未來，阻止UIE步入教堂。

雖然浪漫愛情喜劇一向係劇集至愛，不過因為UIE早前被爆講大話，唔認撻着男星康男，最終兩人戀情見光死，拍拖三個月即宣告分手，未知是否受是非拖累，令到劇集首播收視僅得3.1%，比上周大結局嘅《七日的王妃》7.1%收視，勁跌4%，收視成績認真麻麻。

而噚晚水木劇(逢周三及逢四晚播出)就繼續由《死而復生的男人》成為收視冠軍，噚晚播出第13及第14集，分別得8%及11.2%收視，繼續穩坐收視冠軍，而呂珍九、李沇熹、安宰賢等主演嘅《再次重逢的世界》，噚晚播出第13及第14集，收視有6.7%及7.5%，排同檔第二位。