黃曉明同楊穎（Angelababy）拍拖5年越愛越高調，前晚兩個孖住出席東方衛視喺上海舉行嘅跨年晚會，除咗十指緊扣，黃曉明仲當眾錫Baby額頭晒恩愛，之後又公開愛的宣言，一副情深樣對住女友講：「Baby出身一個普通家庭，15歲就要擔起養家重任，所以她沒有安全感，她是我一輩子想要保護的一個人，她一路走來承受了很多的流言蜚語，很辛苦，但是我不管，我只是知道，我是她需要的那個人，我願意代替她擋箭，做她的暖手包。」Baby即刻感動到眼濕濕，曉明仲要講多句：「我會永遠在你最需要我的時候出現在你面前。」搞到想喊嘅Baby又忍唔住冧笑。

劉愷威楊冪唱冧歌

另一對恩愛夫妻劉愷威同楊冪，前晚一齊出席湖南衛視喺廣州搞嘅跨年倒數活動，今個月8號就係佢哋結婚一周年，前晚係楊冪生完女後第一次再同老公同台，兩個人仲合唱一曲《想把我唱給你聽》，有台下觀眾就大叫佢囡囡花名小糯米。另外，周杰倫前晚喺南京出席江蘇衛視嘅跨年晚會都有帶埋未婚妻昆凌同行。
撰文：馮仁昭