【拍拖都係咁!】馬明為頒獎禮練定天然呆 黃心穎:係天生嘅
馬國明黃心穎車銀優
馬國明同黃心穎憑住《深宮計》攞到人氣電視劇集,問到係唔係覺得好抵,因為除咗攞到獎仲攞埋個人,心穎就即話:「希望星期日再下一城,其實最值得攞獎係我哋嘅團隊。」
問到馬明有冇諗過拉吓票,佢就話:「拉票係冇用,其實套劇出街嘅時候,佢哋鍾意就鍾意,唔鍾意你企佢哋屋企嗌都冇用,佢哋仲話你嘈,投咗都取消啊。」問到視帝又會唔會拉票,佢即刻話好似唔關佢事,咁使唔使練吓個天然呆嘅表情,心穎即時話:「佢唔使練,係天生嘅。」馬明就話:「我真係諗緊啲無謂嘢,例如部車會唔會抄牌,聽日返幾點咁。」
講到拍拖會唔會天然呆,心穎即話:「你夠膽?其實佢平時都係咁。」馬明就話:「其實佢好聰明,講嘢我要諗吓先,怕會會錯意。」
至於人氣韓國男星車銀優就奪得「年度熱搜韓國新演員」,佢透過繙譯話好多謝香港嘅fans,佢仲話有機會都希望盡量嚟香港開騷,同啲fans見吓面。問到佢對香港印象如何,車銀優大讚香港美食好好味,今晚仲欣賞咗《幻彩詠香江》,覺得好靚同好鍾意香港。
精選娛聞,喺晒《娛果》
http://fb.com/appledailyent