當年今日

地產多聲道:管理公司搞環保有得賺

蘋果日報 2002/01/08 00:00


加入環保元素係近年發展商起樓嘅大趨勢,為市場提供唔少商機,好多管理公司重喺旗下屋苑大搞環保,實行為住戶慳錢。新地(016)屬下嘅啟勝同康業兩家物業管理公司,就喺旗下80個屋苑推行「中央回收管理系統」,分類收回廢紙、膠樽同鋁罐循環再造,推行咗1年,回收廢物5500公噸,重賺咗超過63萬,平均每個屋苑有差唔多8000蚊分,起碼對日常開支有啲幫補。

美聯頒發金飯碗
美聯物業改變往年周年聚餐嘅習慣,改為各區自己搞番,其中香港同新界區就揀咗今晚舉行周年晚宴,前者開50席,後者70席。聽講新界區有超過20隻金馬做抽獎禮物,都幾吸引。總行亦會喺今日舉行頒獎禮,其中超過百人攞到長期服務獎,做滿10年嘅重可以攞到個「金飯碗」,得獎者包括陳坤興、執行董事張錦成同營業董事羅國安。
蘭西