譚耀文、金燕玲、春夏、蔡潔等噚晚喺尖沙嘴出席電影《踏血尋梅》祝捷會，呢部戲都好威水，之前郭富城（Aaron）憑呢部戲喺紐約電影節獲頒「亞洲傑出男演員獎」後，電影再喺韓國富川奇幻電影節奪得「最佳電影奬」，成為該影展首部得獎嘅香港電影，戲中飾演援交少女嘅新演員春夏就奪得「最佳女主角獎」，另一位新演員白只亦得「大會特別表揚男演員」，而呢部戲之前亦成為烏甸尼遠東國際電影競賽部份，紐約亞洲電影節開幕電影，台北電影節精選單元，同埋香港電影節閉幕電影，真係犀利。

噚晚祝捷會儀式時，問到阿譚（譚耀文）有咩感受？佢話；「冇感受o架，我都冇攞獎，不過都戥佢哋高興，部戲幾好成績，亦期待票房好。」覺唔覺得自己係福將？佢話冇諗呢啲嘢，最重要拍戲開心。好似今次Aaron犧牲靚仔，要白髮做個老差骨，講佢同城孖住查案，阿譚做下把位，有時會鬧吓玩吓佢咁。佢又話戥女主角咁後生獲獎開心，睇佢個樣應該未到21歲，問佢冇深入了解人？佢即笑話：「呢啲唔使，留俾Aaron啦。」