成日都聽人講「三歲定八十」，廿一歲都未夠嘅洗米仔周柏豪，就話自己冇童真，三歲已經睇阿仙奴對曼聯，對卡通片完全冇興趣。今時今日已經係公司老闆嘅佢話：「o依家每日工作10幾個鐘，會維持早睡早起習慣，確保有足夠能量應付工作。」訪問當日，提議柏豪去球場打籃球，本來安坐辦工室受訪嘅佢，最初有點猶豫，但抵達球場後即急不及待狂射籃，一次、兩次、三次，直至「插針」才願停，堅持唔認輸。

喺籃球場上可以睇到佢唔放棄嘅性格，柏豪話：「真係唔識（放棄）！我覺得堅持好重要，讀書、工作都係，唔堅持好易俾人淘汰。」柏豪又舉例：「睇吓你想做乜，如果理想係終站，好似塞車咁，都會搵另一條路行，放手係底層啲嘅嘢，宏觀咁睇，理想係唔應該變，有啲人做咗幾年嘢悲觀咗，覺得理想已經冇可能，我唔同意。」

柏豪希望鼓勵身邊人，令大家都有一團火：「我有啲同事都上咗年紀，已經30幾歲，如果佢係37歲，我就會同佢講『thirty eight is the new zero』，全部嘢都係新開始發展過。」

講到感情生活，柏豪話自己目前單身，又指o依家拍拖對邊個都唔公平，因為每日都好忙好忙。