做人應該謙卑啲，不過有好消息亦要同大家分享。屬於印刷、出版同設計業一年一度盛事嘅第20屆香港印製大獎，噚日頒發「報紙印刷組」冠軍獎畀《蘋果日報》。比賽由香港印藝學會、香港出版學會、貿易發展局、康樂及文化事務署等機構主辦，噚日舉行頒獎禮，《蘋果》印刷總監方毅強喺主禮嘉賓天文台台長林超英手上接過獎項。
呢個比賽共分13個大項目、24個小項，屬於全港唯一同類型嘅專業比賽。今年係《蘋果》繼96同98年後，第三度攞到報紙印刷組冠軍。作為一分子，八方同一眾同事與有榮焉。