喺某個國度，要證明自己愛國其實唔難，只要喺適當時候講啱聽嘅說話，自然大把人撲出嚟捧你上天。

舉個例，噚日中國同菲律賓喺南海嘅糾紛有咗仲裁結果，海牙常設法院話冇證據顯示中國有合理權益，其實無論喺裁決前定後，中國已經講過好多次唔會承認今次仲裁。提示畀得咁明顯，一班愛國嘅香港同大陸藝人就梗係跟啦。

黃曉明為咗支持祖國，已經即日喺微博連出兩個post，除咗打卡式轉貼咗張染紅地圖相，之後又轉發咗「不接受、不參與、不承認」今次仲裁嘅圖文。以黃曉明喺大陸嘅號召力，可以話係呼風喚雨，結果兩個post加埋足足超過8,000個留言。

不過，Angelababy就冇一齊發功，佢等到今朝先至引用《人民日報》嘅報道兼留言話：「愛好和平，但在主權和領土問題上決不退讓。」當然啦，老公威威老婆都唔輸蝕，單係Baby一個post都7,000個留言。

以為兩公婆加埋有15,000個留言好犀利？未算！曾經俾曉明公開話過「而我不知陳偉霆是誰」嘅陳偉霆（William），遲來先上岸，過咗成晚先post咗一張相，條數反而仲靚過曉明同Baby。

William自從返咗大陸拍劇，喺唔同場合表達佢愛國嘅情操，咁識做自然多咗大陸網民關注。南海仲裁咁大件事，陳偉霆睇到定先出post，跟足大隊作風打tag話：「中國一點都不能少。」雖然William咁遲先表態，但大陸網民真係好畀面，冇鬧佢跟風不特止，仲喺一日之內有成19,000個留言同22萬個讚。

留言嘅內容唔使估，幾乎一面倒咁讚，有網民話：「堅持一個中國，要是所有香港人都跟佛爺一樣這麼霸氣就好了。」、「你很早以前去地震災區蓋房子，新碟義賣捐款，你的態度，作為粉絲早都了解。就算你沒有發聲，我們都相信你的愛國心。」

相反陳偉霆舊愛阿Sa蔡卓妍就因為冇貼愛國地圖而俾大陸網民鬧爆……真係一個天，一個地……(新聞連結: http://bit.ly/29BCUZq )