跳唱女子組合SuperGirls成員陳穎欣（Yanny）同蔡明思（Jessica）今日喺新城電台接受訪問，宣傳佢哋嘅新歌《有事發生》，5缺3得返Yanny同Jessica，原來其他成員都齊齊病咗，Jessica話：「噚日喺活動後佢哋坐埋同一架的士，個司機好病，可能因為咁中招。佢哋感冒菌入腸。」Yanny話未試過3位成員一齊缺席，所以都有啲壓力，但最後佢哋都順利完成訪問，證明佢哋對新歌都好熟識，平時有聽書冇發夢咁話。

講到呢首歌有好多新嚐試，混合咗好多風格，佢哋話：「最有難度係跳呢隻舞踎低起身呢一下，起初真係起唔到身，所以喺拍MV前練咗3個月，訓練體能，初時真係酸軟到行唔到，由銅鑼灣行去北角要用一個鐘。」

腳軟之餘，又要拎水樽鍛鍊，搞到雙手震騰騰，但兩人就好開心可以練出老鼠仔嘅效果，講到新歌MV，佢哋仲鬼咁開心，因為請咗男神余文樂做男主角，迷暈晒各成員，而佢哋仲夢想下次可以請到謝霆鋒o添！