落選港姐李美慧今日嫁富商曾文豪，新郎曾文豪帶住一班中佬兄弟團到達女家接新娘，姊妹楊埕負責門口把關，佢諗住開門罅監察，點知兄弟團勇猛大力推門闖關，話咁易就成功入屋。楊埕亦都好快手喺社交網分享把關一刻嘅短片，聽到佢大嗌：「lock門，喂，無力呀，無力呀，頂門呀。」成班姊妹好嘈吵，跟住佢再大叫：「喂，入嚟要畀入場費先呀！」

新郎入到去，李美慧媽咪將女兒交到女婿手上，着住銀色吊帶裙嘅外母都好後生，索爆程度不遜姊妹團，佢訓示女婿要好好痛錫佢囡囡，新郎哥衝口而出：「總之當埋佢係女。」其實新娘子李美慧真係同曾文豪同前妻生嘅細女曾昭亮同係31歲，曾文豪除咗答應外母錫老婆，佢大爆金句：「最緊要整到我長命。」

可能女家冷氣唔夠，充斥兄弟姊妹團，全屋熱辣辣，曾文豪着住禮服成功接到新娘，心情興奮：「發晒滾，o依家大汗叠細汗。」新娘李美慧又問兄弟團邊個係「青頭仔」，叫佢哋去新房跳床添旺氣。

精選娛聞，喺晒《娛果》
http://fb.com/appledailyent