早排喺日本燒肉店牛角發生嘅「AA制事件」成為全城熱話，事發當時老闆黃傑龍（Simon）身處日本獲頒授名譽唎酒師資格，但不忘越洋為公眾「揭開真相」，繼而推出抽水套餐，原來咁玩得嘅老闆細個係怕醜仔，自嘲係悶棍㖭！
幼稚園到中五，Simon都讀培正，佢話有日搵同校阿妹一齊食lunch，原本班房冇人，點知同學突然返晒嚟，嚇到佢即刻匿埋枱底唔敢見人，後來有同學點醒佢「樣樣都怕瘀，幾時瘀到大呀？」之後先肯面對多啲人，會同同學到巴富街球場踢波，仲組隊叫「野仔」，「我想踢前鋒，但球技比較差，變咗守龍門」。

家貧偷飯食

窩打老道同現年43歲嘅Simon好有淵源，父親黃耀鏗有份創立嘅第一間叙福樓，就喺培正斜對面，附近環球模型店、紅寶石餐廳都滿載唔少童年回憶。富貴唔會從天降，Simon細個家境窮，住板間房，「窮到睇醫生都幾乎冇錢」。有次佢同阿媽去雜貨店，店主啱啱開飯，因為餓得滯，佢打開人哋個飯煲攞飯食，激到阿媽扎扎跳，教佢就算窮都唔可以去偷去搶。
隨住父親飲食生意上軌道，家境漸改善，Simon中五畢業後到澳洲升學，大學修讀土木工程，回港曾任職商界同路政署，處理過馬鐵工程兼擬定過將軍澳區嘅交通燈。2007年接手家族生意，𠵱家係株式會社董事總經理兼叙福樓集團執行董事。