日本隊及美國隊慘敗後,美股及日股即刻大崩圍,唔通世界盃效應真係咁勁?杜指周一晚跌99點,收10792,首次跌穿250日線(現處10809)收市。日股昨日更出現恐慌性拋售,大跌614點或4.1%,收14218。
美股微穿250日線仍然有數講,但日股以大陰燭插穿250日線(現處14574)則比較麻煩,可能要跌至13800才喘定,往後走勢亦屬易跌難升。
港股受外圍拖累,昨日亦跌穿250日線(現處15282)收市,報15234,跌387點。恒指和杜指相似,目前只是輕微跌穿250日線,仍然有數講。美國周二晚公布5月份生產物價指數(PPI),以及聯儲局主席伯南克又講嘢,希望有好消息幫大市喘定。
日前提過中資金融股沽壓重,昨日大戶更全面拋售中資股,H指連6000點亦失守,收5953,大跌264點或4.25%,比日股跌得更多。H指250日線目前在5697,希望是今次調整的底部,唔使下試5000關。