想當日除咗張炳良，食物及衞生局局長高永文都有表明會去，可惜臨近黨慶之日，張炳良突然「被安排」去珠海睇港珠澳大橋工程，高永文又疑似「被放假」，唔去得。民主黨主席劉慧卿噚日同花生友講起，佢話實情黨慶之後，有個別問責局局長都釋出善意，譬如張炳良就畀咗個手機短訊佢，邀請民主黨六位立法會議員連同該黨兩位副主席，喺今個月最後一個星期一晚食飯。
張炳良讀政治出身，又做過民主黨副主席，肯定唔會唔明白政治上冇永遠嘅敵人呢個道理，就算老頂下令玩杯葛，都唔等如事事要同政黨搞到咁僵嘅。
原來民建聯出身嘅商務及經濟發展局局長蘇錦樑，前晚喺工商界新春團拜上遇到卿姐，一樣釋出善意，同卿姐有講有笑；而公務員事務局局長鄧國威日前請議員食飯，卿姐一樣獲邀㗎，只係佢因事未能出席。由此可見，搞對抗唔係成個問責班子嘅中心思想囉。
花生友