三司十一局齊齊上街巡視、洗地、抹電梯，有人批評佢哋做騷玩把戲。話佢哋做騷就真係冇錯，食環署啲人先掃街一次，局長駕到再掃一次，梗係事先夾定啦。不過計我話，大官做騷好過唔做，佢哋唔出嚟行一行嘅話，旺角啲後巷會繼續污穢三幾年，𠵱家咪好囉，何志平巡一巡，之後就有食環署人員掃垃圾，如果何局長唔做騷嘅話，啲垃圾會繼續逗留於後巷三兩年！
咁多人做騷，最努力就係何局長，值得加佢分數。做騷揭露出嚟平時辦事不力，通街垃圾懶理嘅，屋邨衞生敗壞當冇到嘅，就係食環署與房屋署。呢兩位署長要扣分，佢哋嘅上司孫明揚及廖秀冬亦要打手板。董特首唔該將佢哋記過。問責制唔係向我哋市民問責，而係向特首問責，特首閉門鬧吓佢哋，都好應該啫。

從政之人，本來就係要識做騷，譬如演講技巧、身體言語、抱啤啤、巡街食蛋撻，冚扮爛都係要編劇、導演喺後面策劃嘅，只係香港高官唔使競選，只被欽點，毋須討市民選民歡心，住慣豪宅，唔慣巡街，先至不懂民間疾苦。因「沙士」而去幫手清潔街道，大官落區直情對佢哋有益，對香港有益。文革年代，唔少高幹被逼下鄉幹活，辛苦過𠵱家三司十一局幾萬倍，特區大官就算每個月落區做騷一次，都唔算難為佢哋。希望市民唔好批評大官做騷咯，最好鼓勵拍掌，等佢哋做多幾次。