花旗股市前晚又係尾市插，前兩日嘅強勁回升，初步證明係技術反彈，道指收13110，如果昨晚跌穿13000關，短線幾乎可以肯定要試上次低位，即12500嗰頭，就算𠵱家守喺13000，都睇唔到有乜嘢可以刺激個市上番去。
昨日有銀行界人士話聯儲局下個月未必會減息，俊樺就認為聯儲局冇乜辦法唔減息，因為形勢迫人，不過，係咪減息都無關痛癢，𠵱家花旗嘅經濟係發病期開始，有排退唔到燒，減息唔可以起死回生，至於減息對經濟嘅正面影響，就算發揮，都有「滯後」問題，教科書話畀大家聽，最快都要6至9個月啦，如果減得唔夠多，作用唔大。花旗嘅經濟、樓市、股市同美元點睇？一個字──淡！

正股有機試34.5元

港股昨日又唔見咗1136點，有人話係俾花旗股市累，亦有人話係受深圳銀行限制提款影響，乜都假，個市form咗跌勢就要跌，就算有好消息都要跌。大家返轉頭望吓，以前港股狂升嘅時候，壞消息咪一樣唔理照炒，凡事諗兩邊，睇市都會清楚啲。
招行C輪6553：招行（3968）昨收33.25元，跌到日前嘅上升裂口回升，「陀螺」收市，個勢好好，有機會試34.50元阻力，破位可試36.50元，喺𠵱家咁嘅市況，算係值博嘅股份，可以買啲C輪6553短炒，隻輪昨收77仙，槓桿率4.3倍（有效2.7倍），對冲值0.62，正股升上36.50元，6553應該喺98仙樓上，正股再上就睇40元，隻輪有機見1.23元，正股跌穿31.20元止蝕。