關之琳今日現身中環，為自己同陳柏熹一齊打造嘅全新秋冬限量别注系列舉行派對，品牌老闆陳欽杰伉儷同懷孕六個月嘅何嘉莉都有出席。

近年將時間擺喺設計工作上嘅關之琳表示，因為返工時間係朝九晚五，所以生活更規律穩定，唔似拍戲嗰陣日夜顛倒，甚至連生活態度都改變埋：「除咗工作需要，o依家都唔飛，可能以前飛太多，我覺得香港、屋企最舒服，o依家生活好休閒，每星期做4、5次運動，煲劇，不過唔會追，每晚兩點前一定要瞓。」

生活簡單係咪因為未搵到另一半，關之琳笑住話：「有都可以安坐屋企，不過冇咁快，要緣份到，急唔到，聖誕都冇人約。」佢又話聖誕可能會約埋女性朋友聚會慶祝：「以前我都鍾意出去迫，o依家就越嚟越迫，最好人人都去旅行，我就留喺香港度過。」佢解釋每個人生階段都有唔同，o依家嘅佢就希望陪吓屋企人。問到煲劇會唔會煲到有戲瘾？佢就話：「都有少少痕，有戲癮嘅原因係因為覺得劇情好好，但諗到拍戲咁辛苦，就睇吓人哋拍出嚟嘅成果ok喇。」

何嘉莉表示陀第三胎同之前兩次一樣，冇嘔之餘亦已經肥咗10幾磅，早前透露產檢樣本化驗，發現感染B型鏈球菌，佢話若然細菌入侵胎盤，就有機會出現早產，危及胎兒生命：「醫生叫我每日食抗生素，呢種抗生素係最安全，加上我係開刀，可以避免胎兒接觸細菌。」

精選娛聞，喺晒《娛果》
http://fb.com/appledailyent