特首補選，提名到今個星期四就到期，煲呔好耐之前已經穩操勝券，雖然好難攞到七百票，但係六百幾人提名都好高。
之但係話就話贏梗啫，所謂天有不測之風雲，雖然煲呔係天主教徒，但聽講佢都好重視中國傳統，八方姑且幫佢查吓通勝邊日交表穩陣啲啦！一查之下，發覺佢都冇乜日子揀，唔係今日就要等到最後一日，呢兩日係大吉之日，宜交提名。

選舉工程唔會停

按老前輩宋韶光《網中玄》同本報《擇日通書》嘅講法，六月十三日（周一）大吉，宜入學、出行、會友、移徙、祈福同開市；六月十四日（周二）不吉，日值上朔，大事勿用；六月十五日（周三）平日，屬鼠犯冲（老曾屬猴，但係老許屬鼠）；至於六月十六日（周四）就大吉，宜開市、動土同嫁娶，不過等到最後一日先交提名，就好似遲咗少少，如果有咩差錯，真係好難補救，都係唔好冒呢個險好啲。

敵友分明三級制

所以八方奉勸各位大佬今日做好準備，煲呔隨時有行動，連選舉事務處都紮行馬，就知有料到啦。有人奇怪，煲呔重有好多個區未去巡，好多人未去見，點可以咁早交表，原來煲呔嘅競選辦公室唔係咁諗，佢老哥就算交夠提名，大比數勝出，佢嘅選舉工程仍然唔會停，即係係6.16提名期結束後，你重會見到佢阿哥笑笑口，四周圍去探訪，唔信就等着瞧啦！
其實曾蔭權一世好命，官運亨通，睇怕從未試過要四圍求票咁低聲下氣，唔怪得煲呔同人呻，經此一役，知道邊個係真正朋友，邊個係真正敵人。
所謂敵友都可分為三級，「第一級」真正朋友梗係嗰啲二話不說就送上提名嘅選委；「第二級」就係要聽完訓話，有着數先至肯畀提名嘅選委；「第三級」就梗係聽完訓話，最後都係話要返去問過老婆先決定嘅選委，呢類當然唔係煲呔之友啦。
至於最大敵人就未必係唔肯畀票佢嘅社福界或者民主黨中人，反而係平日扮晒老死，但係始終冇表示之人，重有就係發放對佢選舉不利消息嘅有關人士。嗱！煲呔出名記仇，大家好自為之。
八方聽聞，煲呔用到「人情冷暖」嚟形容今次選舉，所以連大班都知驚，上星期三終於遞上提名表，佢提煲呔冇人覺得出奇，不過，當初大班以為可以拉多幾個民主派提名，結果就有啲負老友所託囉。

傳真︰2623-9278
電郵︰[email protected]