周國賢(Endy)一連三場嘅演唱會，噚晚喺旺角麥花臣場館舉行尾場，繼續全場爆滿，除有何韻詩擔任演唱會導演，仲有黃偉文現身捧場，全晚觀眾反應熱烈，Endy亦繼續落力演出，最後要兩度Encore，答謝歌迷嘅支持。

第二次Encore嘅時候Endy唱出導演何韻詩嘅 《勞斯‧萊斯》，全場歡呼，不過唱咗幾句就話唔記得歌詞，隨即邀請坐喺控制台嘅阿詩上台一齊唱，喺觀眾不停歡呼下阿詩終如大家所願上台同Endy合唱，阿詩講笑話：「人哋諗住好有型一路喺台下㗎嘛，o依家就叫人走上嚟。」一曲過後已經晚上11時45分，Endy再唱出《目黑》為演唱會畫上句號。

對於阿詩肯上台合唱，Endy在完騷受訪時表示：「其實唔知佢會唔會肯上嚟，今日係天時地利，原本已經揀咗呢首歌諗住唱，喺台上真係唔記得歌詞，於是就大膽問吓，結果佢真係肯嚟真係好感動。」

Endy又透露三女前晚有嚟捧場，佢話：「細女用紙盒整咗支結他畀我，仲好有心機用鐵線整咗啲結他弦，叫我一定要拎上台，於是就同結他手夾好，等我可以作狀彈到出聲畀囡囡睇，返到屋企太太話我整喊個女，但唔係感動到喊，而係覺得支結他整得未夠好。」完成演出後Endy話會去旅行稍作休息 ：「會全家人三代一齊去旅行，順便休息一下，然後一月又要再投入演出。」

更多娛聞，喺晒《娛果》
http://fb.com/appledailyent