吳卓羲、林保怡、陳豪同鄭嘉穎噚日去咗大埔超級城，宣傳無綫最近推出嘅《男人魅》專輯，吸引過千人圍觀，其中以吳卓羲嘅fans最多，聲勢亦最浩大，而鄭嘉穎嘅歌迷就稍遜。

「我知要反省」
問到鄭嘉穎知否歌迷不多，佢就話：「佢哋喺度，重有同我打招呼，我啲歌迷都唔會再舉牌，其實我歌迷會每年都會有聚會，佢哋支持咗我好多年。」
至於初試啼聲嘅陳豪，都知佢嘅唱功唔掂，佢話：「我知要好好反省。」問佢怕唔怕俾其他歌手比下去，佢就話：「其實已經係比下去，我係新人，冇壓力，唱得重free。」陳豪又話會急起直追，最近重拜師學唱歌，如果有唱片公司搵佢出唱片，陳豪嘅反應係：「唱片公司唔怕死，我都唔怕去死。」
採訪：楊潔雯　攝影：陳偉權

房祖名狗仔孝敬媽咪
房祖名前晚喺灣仔會展為國際青年會五十周年晚宴擔任表演嘉賓，重自爆話今次係執方力申二攤嚟演出。今日係母親節，祖名話要開工，冇時間陪阿媽林鳳嬌，不過佢已經送咗禮物，佢話：「早年我送盆栽畀媽咪，今年我就送咗隻金毛尋回犬畀佢。」