袁詠儀噚日同張叔平、林保怡、趙雅芝等喺中環出席護膚品ComfortZone開幕剪綵活動，佢話酬勞好，賺咗好多奶粉錢。對於近期內地毒奶粉事件越嚟越嚴重，袁詠儀話早輪仲傾咗會拍一個內地奶粉廣告，佢話：「最近傾緊一個內地嘅奶粉廣告，不過毒奶粉報道一出，我就hold住，打去大陸agent叫佢哋畀多啲資料我先，要啲實質文件囉，雖然話係外國入口，但係有事都唔安樂。」

「我咁難搞冇公司簽」

袁詠儀仲話自己做代言人要負責，食得入口嘅都會試過冇事先接拍，問佢係咪會叫囝囝小魔童試飲該廣告嘅奶粉？袁詠儀即刻話：「我自己試！嗰仔都差唔多兩歲，好少食奶粉，佢飲鮮奶多啲。」
提到早輪有傳話袁詠儀會同林建岳合作，簽約畀紅館，佢就話其實紅館旗下嘅管小姐係佢經理人，佢話：「佢係雙重身份，我哋合作咗10幾年，絕對唔係同林生合作，我嗰日唔係去傾拍嘢，係去錄音，自從TVB時簽過畀嘉禾之後，我冇簽過任何公司，因為自由度太細，兩個人易傾啲，我咁難搞，冇乜公司簽我。」
另外，張叔平被問到會唔會幫李嘉欣設計婚紗？佢就一味話唔知，只係讚李嘉欣靚女，同許晉亨好襯。