美國泳手費斯成30歲人仲係咁「弗」，但「女費斯」法蘭克琳啱啱過咗21歲就謝晒。法蘭克琳周二喺美國奧運遴選賽嘅女子100米背泳決賽只得第七名，無緣喺今夏去里約熱內盧奧運進行衞冕戰。
法蘭克琳喺四年前嘅倫敦奧運一口氣擸咗女子100米背泳、200米背泳、4x200米自由泳接力同4x100米四式接力四面金牌，表現非常搶鏡，但之後狀態一路唔係太好，喺舊年喀山世錦賽表現麻麻，只係攞到兩金一銀兩銅，其中喺最擅長嘅100背同200背分別得第五名同銀牌。周二佢出戰美國奧運遴選賽嘅女子100背決賽，只係游出1分00秒24排第七，攞唔到里奧入場券，賽後都難免失望：「今夏我玩唔到呢個項目，感覺好難受。」

洛捷迪驚險保接力資格

至於日前喺男子400米個人四式決賽衰咗嘅洛捷迪，周二喺男子200米自由泳決賽又衰埋得第四，唔可以喺里奧參加呢個單項，好彩都可以去玩4x200米自由泳接力。鼠蹊有傷嘅洛捷迪話：「我好開心可以代表自己國家玩里奧。」另外，基華斯亦喺男子100米背泳決賽衰咗得第三名，唔可以喺里奧進行衞冕戰。不過，周四就滿31歲、歷來贏咗18面奧運金牌嘅費斯就有正常發揮，喺佢強項男子200米蝶泳準決賽游出1分55秒17，以首名身份入決賽。