天氣未凍，打工仔已率先進入寒冬。一場金融海嘯冚埋嚟，連叱咤一時嘅美國金沙集團都要擱置喺澳門嘅金光大道工程，一座座仲未起好嘅豪華酒店變晒做爛尾樓，最慘係一班工人冇工開，手停口停。睇見咁嘅新聞，照計大家應該有啲閉翳，但殊不知有個人反而心感興奮。邊個？咪就係成日都「字字珠璣」嘅賭王何鴻燊囉。
賭王噚日以「東華姑爺」嘅身份，一身網球look捧三太陳婉珍場，落場打慈善網球賽。八方問佢點睇澳門金沙炒4,000人，心情大佳嘅賭王即刻話要贈金沙四粒字，就係「驕者必敗」，仲要「糾正」八方，「佢哋點止炒4,000，炒成11,000，金沙咁驕傲，驕者必敗，呢次乜嘢架都丟清，嚟嗰時就趕走晒中國人，美國人控制。好，睇多幾日。」其實八方講嘅係4,000個香港人，但賭王心水清，慌死人報細咗個數咁。

話葡京未諗過裁員

見賭王咁意氣風發，八方忍唔住問佢，經濟氣候差成咁，咁葡京會唔會裁員先，點知佢即刻拍晒心口話：「我哋冇事，平平安安，未諗過裁員，生意維持原狀。」好，既然賭王咁講，葡京啲員工就要剪低呢篇文立此存照喇。不過，雖然賭王無意裁員，但噚日亞視新聞報道話，賭王個仔有份嗰間澳門皇冠酒店就計劃畀員工選擇放無薪假。
賭王下個禮拜二就87歲生日，作為「壽星佬」嘅賭王透露自己嘅生日願望：「希望大家香港人發財好市，風暴快啲走，唔好搞住香港。」問到賭王生日有乜嘢慶祝活動，佢笑笑口話：「我希望太太畀啲驚喜，都係照舊唔係四圍走，係三圍走。」在旁嘅三姨太就表示為賭王生日禮物籌備咗八個月，但要保持驚喜。
賭王一向都錫幾房姨太，又好錫仔女，對能幹嘅超瓊更疼愛有加。據講佢嘅前女婿許晉亨就快同李嘉欣結婚，問佢收到喜帖未，佢即刻好唔客氣咁再踩亨亨兩腳，「未收到帖，都唔希望收到，由頭一日到最終都唔識欣賞佢（許晉亨），有個咁好咁靚有學識嘅（指超瓊）都唔心足，成日去玩。」至於到時會唔會去飲，賭王話同許世勳夫婦係好朋友：「同佢一路好親家，不過都唔會。」

mailto:[email protected]