當年今日
關於我們

飛短留長:明星髮界10件事$8,000髮剪服侍你個頭

蘋果日報 2006/05/27 08:00


[email protected](左)
入行經驗20年,幫過不少名人明星整頭,長期捧場客有楊紫瓊、梁洛施、謝霆鋒等,係LeSalon嘅大股東。

[email protected](右)
97年入行,但都係LeSalon股東之一,正籌備進軍中國市場,明星捧場客有葉佩雯、蕭正楠等。
[email protected]
入行10年左右,幫過好多明星整頭髮好似楊千嬅、Twins等,做過不少一級Salon,剛加入CHIN.G坐鎮。
[email protected]
Percy曾任職唱片業,後轉戰髮型界,現在擁有自己Salon,幫過達明一派、鄭伊健、鄭中基等整頭髮。

1﹒人手一把「光」髮剪

星級髮型師嘅作戰武器——髮剪嘅價錢都一級過人,LeSalon嘅DirectorRicky:「其實全行都係用日本牌子『光』(HIKARI)嘅髮剪㗎喇,我𠵱家用緊嗰把$8,000,佢嘅鋼水最靚,把把都係全人手做,一把髮剪可以用一世,貴啲都抵啦。有啲鍾意儲髮剪嘅髮型師成萬蚊把都捨得買,不過嗰啲就雕晒花嘅!」

2﹒剪一個頭最貴$1,680

通常一級Salon收費都會分幾個價錢,LeSalon嘅Ricky話:「其實邊個明星同客到Salon剪頭髮都係劃一收費,最高收費係Director級,收$1,500一個頭。」CHIN.G就一樣會將Stylist分做8個Grade,唔同Grade收唔同價錢,按經驗而定,由$380到$1,680不等,當然收最貴都係DirectorBoffy啦。但明星都未必下下唔最貴唔幫襯,好似P-max都係幾百蚊有交易,老闆Percy就話:「佢哋嚟親都唔會淨係剪頭髮,有時電吓,有時染吓,次次都大概一千蚊落樓。」

3﹒星級Salon贈飲威士忌

一級Salon收得一級價錢,當然要提供一級服務。Ricky:「除基本服務有免費飲品外,好多着重私人空間嘅客人都鍾意坐房,坐房收費另加$150至$250,房入面有威士忌飲同DVD機睇,希望人客可以喺最Relax嘅環境整頭髮。」Stone:「如果人客要求,我哋會有Notebook畀人客上網、睇DVD。坐房就唔使另外收錢,但通常明星都會安排坐房,同埋Depends客人Book咗做乜嘢Course,如果收費過千而人客又要求,都會Upgrade畀佢坐。」

4﹒明星反帶挈接大Job

Stylist通常最賺錢就係出街接Job,好似明星出Show、拍廣告、演唱會等。Ricky:「通常最搵錢都係廣告Job,不過有時都要Depends客人Budget有幾多,較低嘅話會派啲Junior少少嘅Stylist出去,好多時呢類型嘅Job都係明星Mark死個髮型師先有得接。其次就係演唱會,最難忘都係幫霆鋒做百事可樂同演唱會嘅Job,佢唔係咁鍾意搞個頭,唔係幾使點整就已經叫做完成任務。」Percy:「傾明星出街整頭,通常都係同經理人傾,要睇自己有冇時間,工作性質同要Hold髮型師幾耐,一般拍半日硬照最少收$2,000-$3,000。」

5﹒最勁收$1,000貼士

Ricky:「我哋客路多數熟客,早幾年佢哋闊佬起上嚟,我試過收$1,000貼士。不過Walk-in客較少,每個月得十幾個左右;為咗增加客路,我哋會同一啲大機構好似酒店、大百貨公司、銀行等傾形象設計,𠵱家好多大公司為改變員工形象,都會搵我哋幫手,到時可順道增加客群。」Percy:「熟客係比Walk-in客多,要接明星客,多數都係靠明星有朋友喺度剪過而介紹,不過都試過有唔少唱片公司密探嚟試頭,發覺啱用就彈起身問有冇興趣幫佢哋旗下藝人整頭,最近一次試過係小雪間唱片公司。」

6﹒着衫最緊要型

Patrick:「其實都盡量希望Stylist着牛仔褲就唔好着Tee,着Tee就最好加番件西裝褸,太過Casual始終唔係咁好,我想客人行入嚟會分到邊個係髮型師,邊個係客,感覺會尊重啲。」Stone:「公司着乜都冇所謂,每個髮型師都有佢自己嘅Character,我自己紋晒身都一樣冇問題,人客睇嘅都係我技術,我着得Casual唔代表我唔專業。」至於P-max都係着乜都冇所謂,但底線係唔好着拖鞋,Percy:「通常都好少出聲,但如果着拖鞋就唔得,太過優皮喇!」

7﹒入行必先洗爛手

Ricky:「其實請Junior有冇經驗都冇問題,入到嚟都係要從頭學起。我自己做洗頭嗰仔陣時,都好畀心機學洗頭,好快就搞到啲客個個Mark我洗頭,洗咗幾個月之後搞到對手爛晒,睇醫生休息咗9個月先好得番。所以真係有心喺呢行發展真係要諗清楚,因為真係好辛苦。」

8﹒朝聖HairShow緊貼潮流

Patrick:「其實做呢行要好勤力,要不停Update自己個Trend係點,又要多啲留意外國HairShow,我自己會鍾意不同睇髮型雜誌Refresh吓自己。突然間叫你整個60年代嘅頭,你都要配合𠵱家新嘅方法去做,再唔會淨係用舊嗰套。」Stone:「有時間有錢梗係想去法國睇HairShow啦,不過近近哋去日本都唔錯。」

9﹒髮型師個頭最求其

問到髮型師幫人整頭無數,好多人最好奇嘅問題都係,咁佢哋嘅頭又係邊個整?佢哋全部口徑一致,好多都係搵番自己Salon嘅師傅剪,大部份時間更會留畀自己啲徒弟Junior試剪,可以教到佢之餘,又可測試佢哋嘅功力。堂堂HairStylist肯攞個頭出嚟畀啲徒弟較飛,做師傅真係偉大。

10﹒終極夢想自己開Salon

一級髮型屋唔同上海理髮店,個個都有型有款,好少見到幾十歲嘅阿伯,唔通做一級髮廊要早啲退休?Ricky:「我𠵱家啱啱先開始,冇諗過咁快退休,我正打算發展中國市場開舖頭,退休?諗都未諗過!」Patrick:「外國有好多出名嘅HairStylist都好老,仲仍然有剪頭髮,睇吓KimRobinson,咪一樣掂!」Stone:「薑梗係愈老愈辣啦,除非我震到攞唔到髮剪,唔係我都冇諗過會退休。」Percy:「呢一行幾多歲退休,從來冇人定過,不過做咗20、30年都冇突破,都係時候應該退休。」
查詢:
LeSalon(25260001)
中環雲咸街33號LKFTower9樓

CHIN.G(25334888)
中環威靈頓街14-24號4樓

P-max(25733382)
銅鑼灣謝菲道530號1樓