【新增動新聞】
尼馬同卡雲尼爭射12碼似乎越嚟越大件事，除咗有報道話佢哋上星期六賽後返到更衣室有衝突，西班牙傳媒更加話尼馬已經同巴黎聖日耳門（PSG）會長艾卡拉菲講咗，佢同前鋒拍檔卡雲尼冇可能共存，要求會方賣走卡雲尼。

PSG以2:0贏里昂嘅法甲聯賽，主隊喺80分鐘獲得12碼，烏拉圭球星卡雲尼準備主射但尼馬上前講咗一輪，之後都係由卡雲尼主射但中楣唔入，其後有報道話卡雲尼喺更衣室話唔鍾意尼馬嘅態度，尼馬亦都好嬲，好在堤亞高施華進行調停衝突先至冇再升級。不過，據西班牙《每日體育報》報道，尼馬同會長艾卡拉菲講咗同卡雲尼係完全冇可能共存，要求會方賣走已經效力咗四季嘅卡雲尼。PSG今季用咗破世界紀錄轉會費2.22億歐元由巴塞隆拿收購尼馬，宜家就睇吓艾卡拉菲點樣拆解喇。