名人程瑤喺尖沙咀開設韓式服裝店DonnaOnstage，今日獲一班圈中好友張家瑩、歐陽妙芝、張秀文、何紫綸、顏子菲、筱靖等到賀。逐一出場時張秀文腳踩三寸高踭鞋差啲絆倒，張家瑩著住粉紅色印花谷胸裝對戰黑色喱士真空張秀文。

家瑩透露衫係由大會提供選擇，佢揀咗身上呢件性感又cute嘅服裝，否認同張秀文鬥性感，仲話大家衣著各有千秋。夏天就嚟到，有冇接泳衣騷搵外快?家瑩話：「一向都有，自己鍾意健康為主，唔好太過火。」而亞視戰友蔡國威同袁潔儀加盟大台，家瑩話:「好恭喜，戥佢地開心，噚日都同威仔講電話，我日前都入咗去電視台做觀眾，撞見好多舊同事，大家都好友善。」

脫離亞視後想唔想有個穩定容身之所？家瑩話:「都想，當日入去見到人地製作下一個item係咩，有人舉哂紙，同以前亞視好唔同，廠房亦大好多。」搵舊同事搭路？家瑩表示唔敢強求，自己會努力。

張秀文就話身上套裙啲喱士開到胸下，唔可以帶bra。佢出場時幾乎仆倒，開頭仲拋句:「落地開花富貴榮華。」點知大家笑佢有何關係，佢笑言:「愈仆愈紅，大展鴻圖。」仲話對絆倒呢啲經驗十足，好彩未試過狠狠地仆落地，自認平衡力差單車都唔識踩，令大家又Tag到可以叫緋聞男友Victor教，張秀文話:「有男友會叫佢教，依家未有。」又話讀書時已學過踩單車好驚，依家更驚會炒車。此外，張秀文有同victor及其餘藝人聯名送上花藍致新張。

歐陽妙芝今日專登撐好友場，近年佢亦追捧韓風，迷上韓男團2PM成員玉澤演，o依家唔會放過任何集郵機會，早前去韓國旅行時就同唔少小鮮肉合照。