當年今日
關於我們

球驗客手記:科木開齋寸羅馬冇料

蘋果日報 2003/01/27 00:00


羅馬前日響意甲對科木樣衰衰咁踢少件,結果吞雙蛋,聯賽三連敗,想做「反底王」就冇份,「茅王」就有得做。完場時科木教練范察堤(圖)重多謝(明寸)羅馬攻極都唔入,等佢哋可以響聯賽開齋。呢隊過氣班霸都衰到貼地囉。
我求大俠覺得羅馬抵俾人窒,佢哋前線確實欠一個擅射嘅Killer(殺手)。好似前日佢哋其實有唔少入球「餐士」,但都把握得差。唔止咁,最衰係佢哋今季成日有人被罰出場,以寡敵眾。計埋呢場波領紅嘅迪拉斯,今季佢哋已經攞咗七張紅牌,係意甲紀律最差嘅一隊。教練卡比路真係要好好管教班「𡃁」。唉!最慘係上仗見到佢哋大炒維琴察,而喺呢場先追寶尾嘅球迷囉!

奧雲爛賭愈描愈黑
球星奧雲爛賭單嘢又有新進展。《NewsoftheWorld》認真抵死,搵到奧雲響世界盃期間嘅輸錢畀戴亞嘅證據,張支票寫嘅數目剛好係三萬鎊。經專家鑑證後,證實張支票係堅嘢。奧雲仔早排承認有賭錢,但誓神劈願話無輸到呢個數,今次真係水洗都唔清,形象分無得淨囉。
列布夫「含怨」噴荷杜
熱刺剩餘物資列布夫終於搵到落腳地,佢以借將身份加盟土耳其球隊費倫巴治年半,睇厭咗有關佢傳聞嘅波友唔使再煩嘞。列布夫臨走重埋怨熱刺領隊荷杜,話對方令佢心碎同埋摧毀佢事業。江湖狹路何愁不相逢,列布夫咪老定,話唔埋借用期滿後費倫巴治唔買斷佢,佢重可能要同荷杜合作㗎。

批中皇蘇頂住皇馬
皇家蘇斯達認真厲害,前日作客砌低主場戰績唔錯、同埋上仗摸和皇馬嘅馬體會,榮膺西甲冬季冠軍(即半季領先隊伍),事實上呢隊波係歐洲主要聯賽唯一未敗之師,震懾整個歐洲球壇。不過叻嘅唔止皇蘇,我哋名家藍鑽石個幾兩個月前批算皇蘇至少保持榜首到二月,果然靈驗。

愉園唔派兵跟操慘過落毒
港聯昨補選咗晨曦列卡度同狄恩踢賀歲波,點知愉園足主官永義喺聯賽盃決賽後話要集中精神踢年初八作客對香雪嘅聯賽,年初四北上集訓,旗下七名港聯球員唔會跟港聯操。唉,本地波已經半死,周不時有呢啲唔派兵踢太公波消息,重慘過落毒;計我求大俠話嘅然坐埋一條船,齊心搞好個市重好啦!