39位建制派議員前日聚沙成塔，整咗封聯署信畀教育局局長楊潤雄，講明反對校園播獨，呢份氣勢何其壯觀！不過，八方聽聞事實並唔係咁，原來成日被指為西環契仔嘅謝偉俊根本唔想簽。點解最後有佢個名？咁就要問民建聯陳克勤喇！

是咁的，聯署單嘢係克勤仔負責，當佢搵人簽名嘅時候，謝偉俊就用「I'll pass」嚟回覆。據聞根本唔想簽嘅謝偉俊咁樣答，意思就係佢唔簽喇，點知係克勤仔會錯意，於是落埋謝偉俊嗰名。克勤仔認咗謝偉俊係咁覆，仲話可能當時大家都有啲誤會。

謝偉俊回覆八方指，陳克勤問佢時，正睇緊李克勤演唱會，故覆咗「I'll pass」，但陳誤會咗佢意思。佢話唔想簽係唔想畀壓力政府同校長，覺得一人少句好啲；而家唔簽都簽咗，佢覺得個情況有啲搞笑，但唔會怪陳克勤，因為又唔係大錯。

點都好啦，對謝偉俊嚟講，唔簽都簽咗咯，反而得佢一個唔簽，分分鐘被人打小報告話佢唔跟大隊。至於克勤仔呢，就要再畀心機練好啲英文，唔係又嚟多次搓my breast就唔好喇。