平安保險（2318）近兩個交易日股價暴跌，H股連續兩日急跌約8%，A股則於周三跌停板後，噚日再跌3%。平保重倉持有的富通集團，虧損消息日前在內地各媒體均有報道，或是導致平保A股跌停其中一個原因。平保已急急發出聲明，表示無重大資訊需要披露。
據外電引述平保發言人稱，公司已於上周進行增持富通集團的行動，惟不肯評論公司股價急挫與此是否有關連。《上海證券報》則引述平保內部人士透露，為改善目前遇到的償付能力危機，富通集團將展開一項約80億歐元的融資計劃，平保將參與其中的一項新股發行，斥資約7500萬歐元用以認購5%新股，力保富通第一大股東地位。

據報道，平保持有富通集團1.13億股，初始投資成本230億元人民幣，至本周二收市價計，持股市值已急劇縮水至112億元人民幣，浮動虧損達50%。是次參與新股認購，意義上同散戶買貨坐艇，再低位溝淡冇乜分別，若然唔參與，則股權勢被攤薄，真係認購又死，唔認購又死。
最慘係由於全世界嘅金融機構都面對漫長寒冬，連大摩都要出售MSCI股權套現救亡，可見情況幾咁嚴峻，唔知平保仲要填幾多次氹?平保大鑊，不期然令人諗起去年炒平保出咗名嘅華置（127）。華置早前公佈，集團上半年待售證券投資錄得公平值變動虧損超過25億元。估計平保佔相當高比重，以平保近兩日跌幅，相信華置嘅投資組合又縮水。