區議會大戰過後,八方噚日喺立法會走廊,見到不同嘅面孔,真係有人快樂有人愁。
快樂嘅係民主派,其中以肥仔李華明最高漲;愁容嘅梗係民建聯,葉國謙最冇聲氣,兩個人都俾記者團團圍住。
八方笑肥仔明冇膽上陣,今次7.1效應咁厲害,掛隻白鴿都會贏,點知肥仔明竟然話就係因為贏梗,所以畀啲後生仔出馬,做幕後助選重正,真大方。
佢重問八方信唔信,喺順天選區,佢比民主女神余若薇重有魅力。咁肥仔明出名「師奶殺手」,畀你威囉。
不過,肥仔都知自己有局限,就係去到麗港呢啲中產重鎮,余大狀就幫手拉到唔少專業人士嘅選票,咁講就差唔多,人哋嚟幫拖,你又讚自己,係咪唔多好。
其實肥仔明咁開心,唔多唔少都因為當年佢輸咗畀民建聯嘅郭必錚,今次派個何偉途都勝出,梗high啦。
(圖)白鴿黨喺區選大獲全勝,肥仔明喺記者面前鬼咁風騷。
傳真︰2623-9278
電郵︰
[email protected]