(新增內容)

台灣天團五月天將於5月4、5、6、11、12及13日假迪士尼樂園幻想道露天場地舉行「五月天Life《人生無限公司》2018巡迴演唱會」。

門票今早10時公開發售，尖沙嘴通利門外有唔少南亞裔人排隊，由於系統故障一度要延遲，有人起爭執，情況頗為混亂。相對旺角麥花臣售票站秩序較為良好，現場亦有警員站崗，排頭位嘅係一班年輕人，接受訪問嘅「企鵝」話佢同朋友輪流排咗7日，準備充足帶齊紙皮、櫈、帳篷等排隊必備「架生」。企鵝好興奮咁話﹕「我哋十幾人夾時間嚟排，我今日曠工嚟排，為未來規劃，為五月天而嚟。(呢度冇黃牛黨？)戰勝黃牛，正義必勝！我好支持實名制，希望政府盡快落實。」

同行朋友就拎住一張A4 size嘅紙上﹕「五月天叫我第一名」，佢話﹕「請咗半日假嚟排，好辛苦，希望優先訂票唔好一間獨大，應該俾多幾間賣，永遠唔改善系統，一日都買唔到，買唔到都唔會買黃牛。」

另外，排喺5、60人中間位置嘅有四個女仔，佢哋亦寫咗一段歌詞﹕「就算失望不能絕望，我叫我的倔強」。佢哋透露27號(即兩日前)開始排隊，但都擔心買唔到飛，戴住口罩嘅阿月話﹕「我哋係大埔過嚟，嗰邊一早就排晒長龍，兩日前嚟呢度排，目測排五十幾，都心慌慌買唔到。(有冇遇過打尖？)以前試過，即只有死物冇人排嘅殭屍位，講完今次冇再出現。但即使有都冇辨法，大家都係歌迷，我哋都係買4張。」

約12點45分正式開賣，排頭位嘅企鵝買到尾場第一行，合共4張門票;而排第二個女仔隔5分鐘後都買到飛，係尾場16行。跟住有位身形略伴嘅幸運兒，亦買到5月11日，第二行嘅門票。但到咗1點20分左右，旺角售票又突然停咗，話系統繁忙中。

精選娛聞，喺晒《娛果》 http://fb.com/appledailyent