曾志偉監製，錢嘉樂執導、鄭伊健、陳小春、謝天華、林曉峰(阿Lo)、佘詩曼等主演電影《黃金兄弟》，噚晚喺元朗舉行慰勞宴，慶祝電影口碑同票房都有唔錯成績，其中大陸上映6日，票房已收逾2.3億人民幣。

此外，一眾兄弟又同時為後日48歲生日嘅阿Lo、下月4號51歲生日嘅伊健，提早切蛋糕慶祝生日，兩個加埋99歲，認真好意頭喇。而佘詩曼噚晚啱啱落機，立即趕去慰勞宴，仲好豪爽拎現金畀大家抽獎。

全場最開心嗰位，應該係曾志偉，因為電影反應好；而最尷尬嗰位就一定係陳小春，事關呢班「黃金兄弟」連日嚟不停去戲院謝票，但總係唔見小春，皆因佢「不停」喺大陸搵人仔囉！小春尷尬笑話：「大家唔好咁銅臭味啦！因為11月開演唱會，得一個月時間去練歌同綵排，頭先先綵排完過嚟。」

相關報道：
【囝囝童年陰影…】宣佈開大陸巡迴騷 陳小春拎Stop Angry做主題
https://bit.ly/2N3FFGr

正當問起小春會唔會叫班兄弟做嘉賓時，小春竟然衝口而出話：「冇機會o架啦！o依家搞緊流程，睇下可唔可以塞佢哋入去啦！」伊健聽完即刻投訴：「嘩！要塞我哋入去呀！」小春知道講錯嘢之後個樣好尷尬，連講三次：「唔係。」跟住再解畫：「『塞入去』唔係代表唔好，大家唔係同一個經理人，夾時間好難，而且大家都好忙。」

問小春點報答兄弟幫手去謝票？伊健搶先話：「不如除衫啦！」錢嘉樂接口：「唔使喇！佢繼續忙，我哋幫佢抽佣。」小春一聽到個「錢」字即刻醒晒：「你哋唔好咁銅臭味啦！」現場各人議論紛紛，最後提議請班兄弟歐遊，小春都係一個尷尬笑樣，冇表態。此時志偉笑住「塞入嚟」話：「對小春嚟講，最煩惱係唔知啲錢點使。」跟住志偉好抵死咁借用Jasper金句，拍拍小春，話：「Don't angry.」

另外，講到伊健日前出席戲院謝票活動時騷除衫騷肌，佢解釋話：「唔係有心，嗰日見到觀眾講得實在太好，現場冇其他嘢送畀佢，冇理由唔送，所以除咗件風褸送畀佢，唔係特登除衫。」志偉即笑話：「我除褲啦！」

至於錢嘉樂分別被成龍、洪金寶、元彪、袁和平大讚電影拍得好，嘉樂開心話：「諗唔到佢哋一齊讚我，但亦會有好壓力大，今年中秋節係我人生中得到最好嘅禮物。希望電影可以開拍續集，志偉繼續做監製。」

精選娛聞，喺晒《娛果》
http://fb.com/appledailyent