講番里奧輸嗰球12碼,球證嘅判決真係好有爭議;曼聯「疑似」寃枉失分,領隊費格遜賽後梗係狂插「元兇」約翰菲恩。佢話:「簡直係笑話!問題源於裁判嘅水準,雖則球證係全職,弊在旁證係兼職呢!除咗個旁證,我唔相信有人會覺得嗰吓係12碼!」連紐記領隊柏度亦撐費Sir:「里奧嗰吓真係幾冒險,但佢真係掂到個波先,我睇得好清楚。」
費Sir又補充:「之前對新特蘭,旁證舉旗示意我哋球員喺禁區內犯手球,但好明顯係對手隻手;不過個球證好清醒,推翻個旁證嘅決定。」費Sir咁講,罷明寸米克鍾斯夢遊球場啦!話時話,英國傳媒爆料指,曼聯對紐記場波嘅執法球證本來係杜特,但佢賽前病咗,先改由米克鍾斯嚟吹,都算曼聯唔好彩囉。