聖誕向來都係政商界中人雞飛狗走嘅時刻，特區政府喺聖誕假都幾乎真空：特首梁振英據知外遊、第二把交椅政務司司長林鄭月娥亦休假。至於財政司司長曾俊華，雖然留港卻要閉關搞預算案，政府總部呢一頭家，呢段時間要靠律政司司長袁國強留守，身為鑽石王老五嘅袁國強，會唔會倍覺lonely？

特首梁振英今晚結束述職行程後開始放聖誕假，今日起至31日離港休假，查實梁太唐青儀日前出席活動都預告聖誕外遊，似乎一家大細去渡假。原本CY放假期間，由林鄭月娥署理特首，但近期因為全民退保忙到爆嘅林鄭，聖誕都要休假唞一唞，所以只喺聽日署理特首一日咁多咋。

一如既往，曾俊華聖誕期間閉關搞預算案，所以都休假專心睇吓派唔派糖。最終鎮守特區政府嘅重任呢，落咗喺袁國強身上，佢喺26日至31日署任特首，喺呢段時間打骰政總。而運輸及房屋局局長張炳良、商務及經濟發展局局長蘇錦樑以及保安局局長黎棟國等梁班子成員，都喺聖誕假鳥獸散噃。司長獨留守，袁國強肯定別有一番滋味在心頭。