樂瞳、林欣彤同胡鴻鈞今日出席喺銅鑼灣舉行嘅活動，樂瞳之前被指佢介入李天翔同女朋友嘅感情，做人哋小三。

見樂瞳呢排好似冇以前咁開朗，問佢係咪為啲新聞而煩，佢就話：「冇為啲新聞唔開心，只係因為之前婆婆同嫲嫲都過咗身，但其實我心情冇咩問題，依家都係好開心。」佢話同李天翔只係同事，私下都冇聯絡，自己以後行為都會小心啲，免得畀人誤會。

林欣彤就話依家身體好咗好多，係咪因為有男友羅孝勇陪佢，佢笑笑口話：「咩呀，佢都有陪，好多朋友都有陪我。」