石油石化股近期成為市場焦點，阿爺宣佈將石油暴利稅起徵點，由40美元調高到55美元，三大油股上星期五繼續發威，早排推介嘅MI能源（1555）亦搶升6%，有貨嘅戰友可繼續以2.20元作短線獲利目標。
國策主導中資股人所皆知，近排消息仲特別多，繼早前商務部要諗計谷起內需，令一眾家電及汽車股炒上後，水泥股又因為碳稅開徵傳聞被洗倉，跌幅隻隻都講緊半成，話之你估值有幾平，一樣照隊可也。
講開估值，唔算平嘅濠賭股隨時成為淡友攻擊對象，事關澳門博彩收入去年全年雖然大升42%，看似強勁，不過齋睇12月表現，按年增長只係得25%，比起早前動輒三四成嘅升幅，明顯有放緩迹象，收入見頂之說不逕而走，家濠賭股預測PE閒閒哋都十幾廿倍，但盈利增長倍倍聲嘅日子恐怕不復再，戰友們唔使咁心急入市，相信遲啲大把平貨執。
唐牛