劉嘉玲、謝安琪、楊思琦、周柏豪等，今晚出席雜誌30周年活動，嘉玲獲頒最高榮譽大獎「FunFearlessAwardWomanofOurTime」呢個獎。

嘉玲就著住黑色裙出席，問到佢早前係咪去咗李嘉誠出資建嘅慈山寺，嘉玲話好感恩去咗呢個地方，表示呢間寺廟遲啲會對外開放，本身打算今個8號生日正日去，不過7號晚飲咗好多，搞到好暈，所以遲咗去。問佢喺Party好醉?佢話:「好High啫，偉仔都好High，每個嘉賓都好盡慶。」

講返今晚得呢個獎，嘉玲話自己受之有愧，個獎係話佢勇敢無懼，咁佢覺得自己係咪?嘉玲話:「我係生命勇士，個天對我唔錯，我回顧咗一下，10歲時唔懂事，20歲扮懂事，30歲係搞事，40歲自以為是，人生o依家去到好成熟階段，45歲之前有2個守護神，堅持同忍耐，45歲之後有寬容同慈悲。」

嘉玲話自己人生好多朋友，比陽光溫暖佢個心，不過都有好多朋友比咗暴風雨佢，佢就話:「不過唔緊要，暴風雨都有水分都有營養，都有好多媒體睇住我強壯起嚟，見證我嘅成長。o依家49歲有49年人生經驗，帶住寬容慈展望未來開心生活，連戰同個仔講過做人要感恩要回饋要奉獻，我就未去到可以奉獻，但就收到大家好大嘅愛。」o依家做人係咪少動氣?嘉玲話:「其實我仲會動氣會嬲，但係o依家嘅功課，係情緒一上嚟就撳低。」王菲咁無求係咪學習對象?佢話:「係，好多方面我都要向佢學習。」

講到陳惠敏最近又講返嘉玲當年被綁架同被影裸照事件，問返嘉玲呢件事，佢就話:「又講呀?」會動氣?佢話:「唔會動氣，我乜都講得，我係普通人一個，人生嘅經歷好普通，係有多啲考驗，每一步都令我成熟，發生咗就係發生咗，可能未來仲有好多功課同考驗。」

俾人重提呢件事已經唔嬲?嘉玲話:「一路都冇嬲，我已經放低咗，係媒體唔肯放過我，我講乜大家都有自己嘅版本，如果我話佢啱啲人又有嘢講，我好感激當初做呢件事嘅人。」呢個話題好厭?佢話:「我接受咗，人嘅心態係撩啲嘢講下會好開心，但係我冇事，都唔係好大件事啫，陳惠敏係幫我解釋咗一個最清楚嘅講法。」同佢熟唔熟?嘉玲話:「唔係好熟，後生時有一齊拍過戲，我覺得好多嘢個天會睇住，適當時候會比個解釋你。」