喺生日歌已經變成一種政治含意時，噚日竟然有一大班人，當街當巷對住之鋒大唱happy birthday to you……咪以為佢哋係反挑機，查實佢哋個個都係之鋒粉絲，事關1996年特區回歸前一年出世嘅之鋒，今日、即係10月13日步入人生另一個階段，就係終於18歲可以攞成人身份證，唔再未夠秤咯！

查實呢次喺佔領運動中過生日嘅之鋒，喺啱啱過咗嘅周六晚開始，不斷「被慶生」。事關當晚喺佔鐘現場，有市民別出心裁送上一個黃色雨傘嘅蛋糕，個名牌仲寫住「之鋒同學 生日快樂 加油 各位同學 一起舉傘 一起的撐！」認真有心思。原來喺當日傍晚，之鋒亦同家人食飯，佢自爆呢餐係9.26佔領政總被捕後，第一餐同屋企人食嘅飯，可算提前慶祝生日，認真溫馨。
生日前一日即係噚日，之鋒繼續留守佔領，仲被市民「反佔領」（圖），除咗大唱生日歌，唔少人仲當咗佢係景點，拉住要同呢位上過《時代周刊》亞洲版封面嘅小英雄合照！正式踏入18歲嘅佢，今朝會上電台講吓佔領運動嘅發展；夠晒秤嘅佢，終於可以投票咯。

李八方
mailto:[email protected]