講到投資，唔少人會即刻諗到買股票，《華爾街日報》網上版調查顯示，接受訪問嘅3500名網民中，接近半數被訪者認為家陣最佳嘅投資工具係股票，接近三成人話寧願揸現金，只有約一成人話會買債券。除咗股票、債券，美國人覺得有咩投資工具好呢？
網友rridgeley喺討論區留言話：「最好嘅投資就係將啲錢存晒入銀行，就算存款利率低，但起碼保證一個仙都唔會少。」Auntilynn話：「𠵱家按揭息率咁低，最好就係借錢買樓，而且人始終都要搵地方住。」BarneyPanfsky就話最好買期油，「如果出現地緣政治問題或者氣候有變，油價必定爆上。」
CousinEustice覺得黃金、白金同白銀等商品先至係最好嘅投資工具：「呢類金屬可以保值，又唔會有太多政治考量。」其實無論選擇邊種投資都好，最緊要喺投資前停一停、諗一諗，評估自己可以承受幾大風險後，先至做投資決定。