唯一公然用英文書、但中文教嘅老牌名校培正中學呢排喜事重重，除咗廣州培正打贏官司攞番個商標外，今年11月底就係培正創校120周年，校方準備大事慶祝，喺機場博覽館擺番120圍，仲計劃10年內籌10億，向住做私立大學嘅目標進發。
培正夠料做英中，偏偏一心做中中，但依然吸引唔少家長報名，就知培正幾巴閉。培正出品嘅名人校友都唔少，包括諾貝爾物理學獎得主崔琦、數學家丘成桐、政務司司長唐英年、浸大校長吳清輝、港鐵CEO周松崗、導演王晶、同啱啱嫁咗嘅藝人黎姿等。

唔少校友係隱形富豪

培正校友出名念舊，好似唐唐咁，已經應承咗做校慶聚會嘅主禮嘉賓。校董會主席何建宗噚日預計，其實擺120圍都未必夠坐，所以呼籲校友們想報名就要快手。至於籌款10億嘅大計，一半錢會用嚟起新教育大樓，一半成立發展基金。何建宗話，透過籌款同向政府免息貸款，新大樓嗰筆好有把握，餘下款項就會向校友同社會人士埋手。
新大樓預計2011年啟用，下面八層畀小學同幼稚園，上面八層就畀培正教育中心辦文憑同學位課程，為發展做私立大學鋪路。但經濟咁差，八方問何教授點籌錢，何教授一啲都唔擔心，話培正有唔少校友係隱形富豪，「有好多靜雞雞收埋好多錢。」好似近幾年捐錢畀浸大同鮮魚行學校嘅顧明均，就幫母校唔少。
培正十幾個省港澳學校負責人，噚日仲聚首香港，向傳媒公佈廣州培正終於攞番培正商標呢件事。呢單官司糾纏咗成10年，香港培正嚟緊都要打場硬仗，因為廣州「冒牌培正」集團喺香港成立咗個以培正為名嘅教育基金，香港培正覺得係影射，培正同學會04年入稟，要求法庭撤銷對方嘅註冊，已經定喺明年中開審。
同學會會長雷禮和話，嗰個教育基金向校友籌款建私立大學，後來佢哋發現負責人係廣州「冒牌培正」集團，好有問題，但包括顧明均在內嘅校友都中咗招，香港培正都借過校舍畀佢哋宣傳，但個基金又冇交代賬目，所以要對佢哋採取法律行動。雷禮和話，廣州培正贏咗，有信心香港會再勝一仗，雙喜臨門慶校慶。

mailto:[email protected]